O auditorio municipal de Vigo acollerá os próximos 24 e 25 de outubro as Xornadas Técnicas Galegas de Iluminación, que congregarán a 175 profesionais e expertos. O obxectivo é difundir os coñecementos máis innovadores sobre a eficiencia e aforro no alumeado que permitan ás administracións un uso enerxético máis eficiente.

Tal e como indicou o alcalde de Vigo, Abel Caballero, na rolda de prensa, Vigo ten que continuar a ser un exemplo de modernidade e estas xornadas servirán para contrastar coñecementos técnicos para que Vigo siga a ser unha cidade «intelixentemente eficiente». Insistiu o alcalde na «necesidade de escoitar á profesión para ver como se pode facer iluminación máis eficiente».

Pola súa banda, o concelleiro de Fomento, David Regades, resaltou que Vigo é referente de eficiencia enerxética en Galicia e en España pola posta en marcha de medidas que teñen permitido diminuír o 10% o gasto en iluminación en so un ano. Referiuse á elaboración do mapa lumínico, que facilita unha radiografía exacta de todos os puntos de luz da cidade; á unha nova ordenanza sobre instalacións de alumeado público ou á posta en marcha de enerxías alternativas, como 4 aeroxeradores. Na súa opinión, estas iniciativas determinan o compromiso do Concello co aforro enerxético.

Contido das xornadas 

Pola súa banda, o delegado en Vigo do Colexio de Enxeñeiros Industriais, Roberto Carlos González Fernández, sinalou que “a nosa idea é que estas xornadas se convertan nunha cita anual, que se pon en marcha en Vigo e que despois trataremos de organizar nas demais cidades de Galicia”. Estas primeiras Xornadas Técnicas Galegas de Iluminación están organizadas polo Colexio de Enxeñeiros Industriais de Galicia, polo Concello de Vigo e pola Axencia de Enerxía de Vigo (Faimevi).